Иван Карадак: од „Коприварник“, 1978

ЗА ВЛАКНО

Мнозина со разумот ќе постигнеа слава,

да не им пречеше сопствената глава.

НЕИЗЛЕЧИВ

Кутриот хипохондар, умре од страв.

Му рекоа дека е — здрав!

ПОКАЈАНИЕ

Искрено си ја признавам вината:

главата в песок ја криев.

Во виното била вистината,

а јас само ракија пиев!

НАПРЕДОК

Досега ме меса ко тесто,

но од денес успеси бројам.

Повеќе не тапкам в место,

почнав мирно да — стојам!

МЕТОДИКА

Пред да ги научите што е готика,

објаснете им што е — мотика!

ИНТЕГРАЛЕН ПОЛТРОН

Стигна до врвот благодарејќи на пактот

меѓу коленото, 'рбетот и лактот!